Teach Wuk Too Haad

But what a prekkeh doh eh?!

COVID-19 meck parents a teach dem owna pickinney

Sum a complain seh di pickney dem a get tuh much work

An’ some a complain seh dem nah get enuff

Sum a wanda if dem a guh get teacha pay

And some a wanda if a suh dem pickney head did tuff.

Laas week mi nayba she call mi a aks mi if mi know Pi

Mi say, yes ma, mi dawta buy it sometime but a nuh sitten weh catch mi yeye

She buss outta laugh an’ say but mi tink yuh did brighta dan mi

My dawta she buss out, mammy we use pi inna chigganamichy (trigonometry)

Mi say, chigga-warra?  Chiggananny…child, mi nuh play dat deh game deh from mi a lickle 

      pickinney

Yessideh mi tell mi dawta seh mi soon come, gwaan pay attention inna class,

Mi grab mi cutlass and preten’ like mi a gu weed up piece a grass

Mi guh roun’ a back an’ siddung cause mi brain tiad suh till

An’ all mi coulda tink is bwoy dem yah teacha ya full a knowledge an’ skill

A how dem manij get a class full a 30 pickney fi stay still?

Ebry minute di pickney wah go baatroom 

Ebry secan she eena di fridge

Bwoy, mi nuh know how long dis a guh last enuh, but mi know mi cyaan manij

About a hour layta mi guh back inna di house, mi seh class muss done by now

Nuh di lickle pickney dat a wait pon mi, “mammy a fi yuh time now”

Mi sey, fi mi time fi do wah, afta mi mi nah go a school, 

she say “mi know dat mammy, but teacher gimme maths homework and say yuh fi help mi figga out di rule”

Mi mout’ drap open an’ mi head start swell, yuh woulda tink a rollin’ calf lick mi

Rule, di only rule me know a di golden rule, an a bible class me learn dat, not school.

No sah, teacha wuck too hard, mi nuh tink mi cyan manij e’

No wanda nuff a dem yah teacha yah out fi lose dem sanity

An’ pickney a renk wid teacha, an all wah fight dem off tuh

Den before parents discipline dem, dem gone a school like some butoo

Gone cuss off teacha and principal and all wah fight off teacha to.

From now on, teacha a mi bess bess fren, Mi nah question dem agen

Teacha deserve a whole heap a respec’ and blessing, suh mi nah stop pray fi dem

A dem teck care a wi pickney when we gone a work or just deh a yaad

If a neva fi COVID-19, mi wouldn’t know seh teacha wuck suh haad.

Mi nah complain agen sah, 

an mi a meck sure di pickney do her homework

And she betta respec’ her teaha, An nuh badda go ack like no jerk

Teachas, mi liff mi hat to unoo, unoo strong like farmer harse

Unoo teck all kina abuse and disrespect and still go back go teach unoo class

Unoo skip lunch time and dinner, just fi mark di pickney dem book

Sometimes a all junk food unoo eat, cause unoo nuh ha no time fi cook

Big up unoo self teachas, mi respec’ fi unoo tan up trang

Mi love unoo like cook food; just like coco, dasheen and yam.

Corona, Teck Weh Yuself

Corona! A Weh yuh come yah fah?

It look like a di world yuh come fi teck ova

Corona! A Wah yuh waah roun yah

Yuh nuh see say yuh nuh welcome bout ya. 

First yuh go visit Wuhan, China

Kill off di pickney dem madda and fada

When dem ketch up pon yuh, yuh pick up speed an wah

Before we realize, yuh reach a South Korea.

Two months later, mi a n di paypa

Mi see say yuh land in di great America, 

kick up rumpus, lef we wid paranoia, 

Now, look Weh yuh duh, Bwoy yuh couldn’t brighter

Yuh really hijack plane go all di way a Jamaica 

We a look fi yuh a town, yuh reach a Manchester

A put pressure pon we poor nurses and doctor 

Now, di country lockdown so people can be safer  

Mi think yuh did tough, but trust mi Tufton tougher

Corona! A wah yuh want wid we 

Look how much people yuh kill a Italy 

Yuh have di health professionals in confusion 

And a di same ting yuh a try fi do a England.

Corona! Yuh tun all people inna fool

Yuh lock dung businesses, churches and schools

Paper towel,wipes and toilet paper 

Got even di most frugal turning into hoarder. 

Corona, look how mi hand dem dry

These days not even Matta mi can teck outta mi eye

Corona, yuh really gwaan bad man 

Wait, how much longer yuh plan fi stay ova England? 

Bwoy, mi just glad yuh never ketch Harry and Megan

Mi tiad fi check fi corona Symptom 

Sometimes mi Haffi wonda if mi a tun mad woman

Stay home, Social distancing and regular Wash hand 

How much longer we fi live inna dis yah condition 

Corona, look how yuh mash up mi fren

Not even bathrooom him cyaan walk go agen 

Corona, a time yuh teck weh yuhself

Mi tiad fi go supermarket and see empty shelf. 

Corona!!! Teck weh yuhself!!